Okkur langar að minna á rafrænu fræðsluna á vef BHM sem sett var á laggirnar í vor vegna COVID-19 heimsfaraldursins. Tilefnið var að margir félagsmanna aðildarfélaga BHM hafa misst vinnuna eða eru á hlutabótaleið. Aðrir eru í störfum þar sem álag er mikið og langvarandi vegna ástandsins, annaðhvort í vinnu eða heima fyrir.

BHM vill leggja sitt af mörkum til þess að létta sínum félagsmönnum róðurinn og býður því upp á rafræna fræðslu sem er í senn praktísk og hvetjandi.

Rafræna fræðslan er félagsmönnum að kostnaðarlausu og opin öllum, aðeins þarf að skrá sig til að fá aðgang að öllu efninu. Því er skipt í tvennt til að koma sérstaklega til móts við hvorn hópinn fyrir sig, en þeir sem skrá sig hafa samt sem áður aðgang að öllu.

Smelltu hér til að skrá þig. 

Meðal fyrirlestra eru:

• Streita í skugga faraldurs – Þóra Sigfríður Einarsdóttir
• Réttindi starfsmanns við uppsögn – Andri Valur Ívarsson
• Betri svefn, grunnstoð andlegrar og líkamlegrar heilsu – Erla Björnsdóttir
• Í leit að starfi – Geirlaug Jóhannsdóttir
• Fjármál við atvinnumissi – Sara Jasonardóttir
• Listin að breyta hverju sem er – Ingrid Kuhlman
• Atvinnuleysistryggingar – Gísli Davíð Karlsson

Tvisvar til þrisvar á ári hefur BHM haldið námskeið fyrir trúnaðarmenn aðildarfélaga sinna. Námskeiðin hafa verið haldin í húsakynnum BHM í Borgartúni 6 en lengi hefur verið stefnt að því að gera fræðsluna aðgengilegri með því að færa hana yfir á rafrænt form.

Nú hafa kórónuveirufaraldurinn og samkomutakmarkanir flýtt þeirri vinnu og róið er að því öllum árum að útbúa efni og taka upp myndbönd sem munu koma í stað námskeiðs á staðnum. Efnið verður gert aðgengilegt í október á sérstakri síðu á www.bhm.is, þar sem trúnaðarmenn geta skráð sig inn til að fá aðgang að því og munu geta leitað í það eftir tilefni.

Tekið skal fram að þótt námskeið færist yfir á rafrænt form þá er stuðningur og ráðgjöf að sjálfsögðu áfram í boði frá stéttarfélögum innan BHM. Við hvetjum því trúnaðarmenn eindregið til að leita til síns stéttarfélags hvort sem er til að fá persónulegan stuðning eða aðstoð vegna mála sem upp koma á þeirra vinnustað.

Stutt myndbönd og efni til niðurhals

Fræðsla trúnaðarmanna mun samanstanda af styttri myndböndum (10-30 mínútur) um skýrt afmarkaða þætti geta komið upp á vinnustöðum og/eða trúnaðamenn þurfa að gæta að.

Til dæmis:

• Kosning og vernd trúnaðarmanna
• Hlutverk, réttindi og skyldur trúnaðarmanna
• Ráðningarsamningar – tímabundnar og ótímabundnar ráðningar
• Afnám launaleyndar – upplýsingalög og opinberir starfsmenn
• Jafnrétti og vinnumarkaður, skyldur atvinnurekenda
• Kjara- og stofnanasamningar
• Sjóðir BHM
• Einelti og áreitni á vinnustað
• Stytting vinnuvikunnar
• Vinnutími, helstu hugtök og skipulag vinnutíma
• Persónuvernd – trúnaðarskyldur og persónuvernd

Einnig verður sett inn efni til niðurhals fyrir trúnaðarmenn, sem ætti að auðvelda þeim að m.a. kynna sitt hlutverk á vinnustað og koma mikilvægum upplýsingum til samstarfsfólks síns.

Það er von okkar hjá BHM að þetta fyrirkomulag auðveldi trúnaðarmönnum að leita upplýsinga um hvaðeina sem upp kemur í þeirra starfi á sem einfaldastan hátt.

Sem fyrr segir verður efnið verður gert aðgengilegt í október, nánari upplýsingar um hvernig má nálgast það verða sendar til trúnaðarmanna þegar þar að kemur.

Síðastliðin ár hefur mikill fjöldi félagsmanna haft samband við skrifstofu KVH vegna greiðsluseðla í einkabanka sem þeir töldu vera frá sínu stéttarfélagi. Kjarafélag viðskiptafræðinga og hagfræðinga vill árétta að það sendir ekki út greiðsluseðla í einkabanka félagsmanna. Félagsgjald KVH er 0,6% af heildarlaunum og er skilað inn af vinnuveitanda fyrir hönd félagsmanns. Vinnuveitandi greiðir í lögbundna sjóði BHM og einnig í valkvæða sjóði BHM sem samið hefur verið um í ráðningarsamningi. Ekki er um aðrar greiðslur að ræða til KVH og sjóða BHM.

Borið hefur á því að félagsmenn stéttarfélaga, sem aðild eiga að Starfsþróunarsetri háskólamanna (STH), eru í tengslum við samþykktar umsóknir sínar að verða fyrir aukakostnaði vegna aðgerða í kjölfar COVID-19 eða fá ekki endurgreiðslu fyrir útlögðum kostnaði námskeiða sem felld hafa verið niður.

Vegna þessa hefur stjórn STH ákveðið að koma til móts við félagsmenn í þessum aðstæðum og gefa kost á viðbótarstyrk allt að 50.000 kr., sem gildir til 1. maí 2021, til þeirra sem þegar hafa sótt um styrk og verða fyrir aukakostnaði af þessum sökum. Styrkur þessi hefur ekki áhrif á styrkrétt viðkomandi.

Er því eftirfarandi styrkt (samtals að hámarki 50.000 kr.):

1. Breyting, niðurfelling eða kaup á nýju flugi

Styrkur er veittur fyrir breytingargjaldi flugs eða greiðslu á nýju flugi ef það er ekki er hægt að breyta flugi sem tilheyrir sama verkefni. Leggja þarf fram gögn um að endurgreiðsla fáist ekki og/eða að viðkomandi hafi ekki fengið tjónið bætt að fullu hjá kortafyrirtæki/tryggingafélagi sínu.

2. Kostnaður sem ekki fæst endurgreiddur

Styrkur er veittur til félagsmanna fyrir þeim kostnaði sem þeir hafa lagt út fyrir ef ekki er möguleiki á endurgreiðslu enda hafi þeir reikninga/greiðslukvittanir fyrir útlögðum kostnaði. Leggja þarf fram gögn um að endurgreiðsla fáist ekki.

Nánari upplýsingar um hvernig á að sækja um styrkinn eru hér: Starfsþróunarsetur háskólamanna .