HVER GÆTIR ÞINNA HAGSMUNA?

HVER GÆTIR ÞINNA HAGSMUNA?

Kjarafélag viðskiptafræðinga og hagfræðinga

Kjarafélag viðskiptafræðinga og hagfræðinga (KVH) er stéttarfélag viðskiptafræðinga og hagfræðinga. Félagið sér um að gera kjarasamninga fyrir hönd félagsmanna, bæði á almennum og opinberum vinnumarkaði.  Það vinnur að bættum kjörum félagsmanna, gætir réttinda þeirra og er óháð starfsvettvangi, vinnuveitanda eða ráðningarformi.

Alls eru greiðandi félagsmenn nú um 1.700. Um helmingur þeirra starfar á almennum vinnumarkaði en tæplega helmingur hjá hinu opinbera.

KVH hefur það að markmiði að félagsmenn þess njóti bestu mögulegrar þjónustu og hagsmunagæslu á hverjum tíma. KVH er aðili að Bandalagi háskólamanna.

Aðsetur KVH og BHM er að Borgartúni 6, Reykjavík.

Skrifstofa KVH er opin sem hér segir:

Mánudaga – fimmtudaga 9:00-12:00 og 13:00-16:00.

Föstudaga 9:00-12:00.

Efst á baugi


Færðu samninganefnd ríkisins heimabakaða köku

BHM-félög skora á ríkið að leita lausna sem báðir aðilar geti unað við

 

Fulltrúar ellefu aðildarfélaga BHM færðu samninganefnd ríkisins heimabakaða köku á samningafundi aðila í morgun. Með þessu vildu félögin, sem eru í samfloti í yfirstandandi kjaraviðræðum við ríkið, hvetja viðsemjandann til dáða en viðræðurnar hafa nú staðið yfir í tæpa 10 mánuði og lítið þokast í samningsátt. Fundurinn í morgun var sá 42. í röðinni.

 

Leitað verði lausna
Félögin ellefu telja að þær launahækkanir sem ríkið hefur boðið séu ófullnægjandi. Þá geta félögin ekki sætt sig við að félagsmenn greiði fyrir styttingu vinnuvikunnar með lækkun á yfirvinnutaxta og sölu kaffi- og matarhléa, líkt og ríkið hefur boðið. Að mati félaganna er þetta ekki til þess fallið að draga úr vinnutengdri streitu og álagi. Þvert á móti er hætta á að tíðni veikinda hjá starfsfólki aukist með tilheyrandi kostnaði fyrir ríkisstofnanir og samfélagið allt.

 

Félögin ellefu eru: Dýra­lækna­fé­lag Íslands, Fé­lag geisla­fræðinga, Fé­lag ís­lenskra nátt­úru­fræðinga, Fé­lag ís­lenskra hljómlist­ar­manna, Fé­lag líf­einda­fræðinga, Fé­lags­ráðgjafa­fé­lag Íslands, Iðjuþjálf­a­fé­lag Íslands, Kjara­fé­lag viðskipta­fræðinga og hag­fræðinga, Ljós­mæðrafé­lag Íslands, Sál­fræðinga­fé­lag Íslands og Þroskaþjálf­a­fé­lag Íslands.

Morgunverðarfundur Handsleiðslufélags Íslands 30. janúar á Grand Hótel og afmælisdagskrá

Handleiðslufélag Íslands – Handís fagnar 20 ára afmæli á árinu og hefur af því tilefni sett saman afmælisdagskrá en afmælinu verður fagnað með ýmsu móti. Handleiðslufélag Íslands er þverfaglegt félag sem hefur m.a. það markmið að stuðla að þróun og hagnýtingu handleiðslu ásamt því að kynna kosti og gildi hennar í faglegu starfi.

Við byrjum árið með morgunverðarfundi þann 30. janúar þar sem Alma D. Möller, landlæknir, mun koma og fjalla um heilsu og líðan í starfi en starfstengd streita og kulnun ógnar heilsu okkar og lífsgæðum. Einnig verður erindi um siðfræðilega sýn og afmælisdagskráin fyrir árið kynnt.

Morgunverðarfundurinn sem og afmælisdagskráin í heild sinni á erindi til allra þeirra sem vilja efla sig í starfi, fræðast um handleiðslu og hvernig hún nýtist best sem forvörn gegn streitu og kulnun í starfi.

Handleiðslufélag Íslands vonast til að sjá sem flesta á afmælisárinu og að fagfélögin sjái til þess að koma upplýsingum til sinna félagsmanna og auglýsi viðburði ársins.

Hér er einnig hlekkur á viðburðinn á Facebook:
https://www.facebook.com/events/466953843924059/

Til að einfalda alla umsýslu jafngildir millifærsla skráningu. Verð
er 3.500 kr. og er morgunmatur innifalinn. Bankaupplýsingar: 334 26
051543, kt: 520700-3310. Senda skal kvittun til gjaldkera á
netfangið:sigurley@landspitali.is

Ef einhver hefur ekki aðgang að heimabanka má setja sig í samband við gjaldkera varðandi skráningu og óska eftir að greiða við inngang á fundardegi.

Staða kjarasamningsviðræðna

Kjarafélag viðskiptafræðinga og hagfræðinga hefur fundað að nýju með SNR (Samninganefnd ríkisins) á nýju ári eftir þriggja vikna fríi að frumkvæði SNR.

Félagið hefur átt einn fund með SNR í janúar og er næsti fundur áætlaður á þriðjudaginn. Ráðgert er að funda tvisvar sinnum í viku næstu þrjár vikurnar.

Félagið hefur ekki fundað með samninganefnd Reykjavíkurborgar eftir áramót og ekki er komin dagsetning á næsta fund.

Engir fundir hafa fengist með samninganefnd Sambands íslenskra sveitarfélaga (SNS).

Frekari fréttir af stöðunni verða birtar hér á heimasíðunni í framhaldinu

Lífið í harkinu – málþing um stöðu sjálfstætt starfandi háskólafólks fimmtudaginn 30. janúar.

BHM efnir til málþings um stöðu sjálfstætt starfandi háskólafólks fimmtudaginn 30. janúar nk. á Grand hótel Reykjavík. Yfirskrift málþingsins er „Lífið í harkinu – sjálfstætt starfandi háskólafólk í breyttum heimi“. Það er opið öllum sem áhuga hafa, án endurgjalds og meðan húsrúm leyfir, en skrá þarf þátttöku fyrirfram á vef BHM.

Í Evrópu og víðar færist í vöxt að háskólamenntað fólk sé sjálfstætt starfandi eða sé bæði í föstum störfum og vinni sem verktakar. Þróunin helst í hendur við breytingar á vinnumarkaði sem kenndar hafa verið við harkhagkerfið (e. gig economy). Í stuttu máli felast þessar breytingar í því að fyrirtæki og stofnanir velja fremur að útvista verkefnum en ráða fasta starfsmenn til að sinna þeim. Ný tækni hefur auðveldað útvistun en hún fer í auknum mæli fram gegnum svokallaða netvanga (e. digital platforms) sem eru sérhæfðar vefsíður sem tengja saman kaupendur og seljendur þjónustu.

Víðast hvar er þó ráðningarsamband enn grundvöllur vinnumarkaðstengdra réttinda sem ýmist eru bundin í lögum eða kjarasamningum. Þessi réttindi ná yfirleitt ekki nema að mjög takmörkuðu leyti til fólks sem er sjálfstætt starfandi. Í nágrannalöndunum hafa stéttarfélög lýst áhyggjum af stöðu fólks sem vinnur í harkhagkerfinu og gripið til ráðstafana til að bæta réttindi þess.

En hver er staðan hér á landi?
Fer sjálfstætt starfandi háskólafólki fjölgandi eða fækkandi?
Hvaða breytingar þarf að gera á lögum og reglum til að bæta stöðu þessa hóps?
Hvernig geta stéttarfélög háskólafólks bætt þjónustu sína við sjálfstætt starfandi félagsmenn?

Þetta eru meðal spurninga sem ræddar verða á málþinginu 30. janúar.

Dagskrá

13:00 Setning
Þórunn Sveinbjarnardóttir, formaður BHM

13:10 Vinnumarkaður framtíðarinnar – hvaða breytingar eru framundan?
Katrín Ólafsdóttir, lektor við HR

13:40 How can unions support and represent the self employed?
Kirstine Baloti, sérfræðingur HK í Danmörku

14:15 Kaffihlé

14:40 Lagaumhverfið – er breytinga þörf?
Andri Valur Ívarsson, lögmaður BHM

15:10 Pallborðsumræður

15:50 Samantekt fundarstjóra

16:00 Málþingi slitið

Fundarstjóri er Gunnlaugur Már Briem, varaformaður Félags sjúkraþjálfara.

Málþingið er opið öllum sem áhuga hafa, án endurgjalds og meðan húsrúm leyfir, en skrá þarf þátttöku fyrirfram á vef BHM.

Smellið hér til að skrá þátttöku.

 

Félagsaðild

Í boði er meðal annars:

  • Fæðingarstyrkir og sjúkradagpeningar
  • Starfs- og endurmenntunarstyrkir
  • Sumarbústaðir og orlofshúsnæði, innanlands og erlendis
  • Styrkir til gleraugnakaupa og heilsuræktarstyrkur m.m.

Námsmannaaðild

Námsmenn í viðskiptafræði eða hagfræði á háskólastigi, sem lokið hafa a.m.k. 60 einingum (ECTS) geta sótt um námsmannaaðild að KVH (NKVH). Slík aðild felur m.a. í sér:

  • Aðgang að upplýsingum og leiðbeiningum félagsins er snerta störf og kjör á vinnumarkaði
  • Aðstoð við gerð ráðningarsamninga
  • Aðgang að námskeiðum/málstofum KVH á ári hverju. Efni námskeiðanna eru fjölbreytt og höfða til námsmanna
  • Gjöf frá KVH þegar að námi lýkur